JESUS hett Di leev

JESUS hett Di leev!
Dat gifft vööl, wat wi neet begriepen könen: Krieg, Smacht, Dood un egen swaar Lasten. Waarum?
Womögelk fraagst Du Di: Wenn Gott würkelk Leevde is, waarum lett he dat dann all to? Nu, wi hebben neet up alls en Antwoord. Heel seker neet! Man eens weten wi: JESUS hett uns leev!
Un waarher könen wi dat weten? JESUS sülvst hett eenmaal seggt: „Nüms hett en grötter Leevde as de, de sien Leven lett för sien Frünnen“. Stell Di vör, dat hett JESUS för uns daan! He leet sien Leven för uns Minsken. Du fraggst Di seker: „Weer dat denn nödig?“
Süh, ik will Di dat kört verklaren: Weetst Du, dat mussde wesen. All dat Övel un dat Quade in de Welt kummt daarvan, dat wi Minsken sündigt hebben. Dat heet, wi hebben GOTT de Rügg tokehrt. Un so brengt de Sünd de Minsken utnanner un trennt uns van GOTT. De Sünd nimmt uns ok de Free. Un heel leep: De Sünd treckt Straaf na sük.
Man JESUS namm uns Sünd up sük. „De Straaf lagg up hum, to uns Free,“ see eenmaal de Prophet Jesaja. Dat dee JESUS ut Leevde to uns, un dat al lang, vördem wi geboren worden sünd un in disse Welt kwammen.
JESUS stürvde för uns, umdat wi leven könen, ewig leven, alltied in Gemeenskupp mit GOTT un de Minsken.
Un denk daaran: JESUS hett uns vandaag ok nettakkraat noch so leev! He is lebenning un leevt! Denn GOTT hett hum van de Doden upstahn laten. JESUS is Minsk worden un versteiht uns in de Olldag mit all uns Lasten. He begrippt all Dien Fragen.
Man he dwingt sien Leevde nüms nich up; doch he mugg jovörallen geern, dat Du hum in sien Leevde annehmen deist.
Wi, för uns Part, hebben de Leevde annohmen – un weten un hebben unnerfunnen: Dat stimmt un is wiss wahr! JESUS is in uns Leven to en Quell van Ruh, Free un Freid worden. He hört uns, wenn wi beden. He gifft uns Troost un Kraft ok in sware Stünnen.
Wullt Du mehr van disse Leevde un van JESUS weten? Dann lees in de Bibel, beed un proot (snack) mit Minsken, de de Leevde JESU gewahr worden sünd.
Wenn Du maggst, kannst Du uns ok schrieven.
De Heer JESUS CHRISTUS segen Di!
 

 

Die Kommentare sind geschlossen.